فتنۂ قادیانی نبوت

واپس - فہرست مضامین

بِسْمِ اللہِ الرَّحْمٰنِ الرَّحِيْمِ

فتنۂ قادیانی نبوت

قرآن و سنت کی روشنی میں

تمہید : اللہ تعالیٰ انسانوں کا خالق و رب ہے اور رب ہی کے ذمہ ہے کہ وہ اپنے بندوں کی تمام ضروریات کی تکمیل کا سامان فراہم کرے ۔ چنانچہ مادی ضرورتوں کے لئے کائنات بنایا ۔ اور ان کی سب سے اہم و بنیادی ضرورت یعنی ہدایت و رہنمائی کے لئے آدم ؑ تا عیسیٰ ؑ تک دنیا کے ہر ملک ‘ علاقے اور قوم میں پیغمبر مبعوث کرکے کتابیں نازل فرماتا رہا جیسا کہ ارشاد الٰہی ہے :

وَلِكُلِّ اُمَّۃٍ رَّسُوْلٌ۝۰ۚ ……  سورہ یونس  ۴۷         اور ہر اُمَّت کے لئے رسول ہے ۔

وَّلِكُلِّ قَوْمٍ ہَادٍ۝۷ۧ ……… سورہ رعد                 ہر قوم کے لئے ہادی ہے ۔

اور ہدایت و رہنمائی کے سامان کی حفاظت اہل ایمان ہی کے ذمہ رکھی ۔

 بِمَا اسْتُحْفِظُوْا مِنْ كِتٰبِ اللہِ ……  سورہ المائدہ ۴۴ (بوجہ اس کے کہ ان کو کتاب اللہ کی حفاظت کا حکم دیا گیا تھا )

جب عیسیٰ ؑ پر ایمان لانے والے بھی کتاب اللہ کی حفاظت نہ کرسکے تو اللہ تعالیٰ نے اپنی کتاب ’’القرآن‘‘ جس کی قیامت تک حفاظت کرنے کا وعدہ کرکے نازل فرمایا اور اپنے اس وعدہ حفاظت کی تکمیل اس طرح فرمائی کہ قرآن میں پیغمبروں ‘ صالحین ‘ محسنین ‘ متقین ‘ مصلحین ‘ عباد الرحمن ‘ طالبانِ آخرت و طالبانِ دنیا ‘ کافر و مومن ‘ فرمانبردار و نافرمان ‘ مفسدین اور سرکشوں کے اعمال بیان کرتے ہوئے ہدایت و گمراہی ‘ علم و جہل‘ اصلاح و بگاڑ ‘ اچھائی و برائی ‘ منکر و معروف ‘ نیکی و بدی ‘ اتفاق و اختلاف ‘ ضد و ہٹ دھرمی ‘ ایثار و خود غرضی ‘ بخل و سخاوت ‘ غرض انسان کے ہر اچھے و برے جذبات و خواہشات کی نشاندہی کرتے ہوئے ان کے دنیوی و اخروی ‘ عارضی و ابدی انجام کو اپنے قانون جزا کی روشنی میں تفصیل سے بیان فرمادیا ہے ۔ جیسا کہ ارشاد الٰہی ہے :

وَہُوَالَّذِيْٓ اَنْزَلَ اِلَيْكُمُ الْكِتٰبَ مُفَصَّلًا۝۰ۭ (سورۃ الانعام : آیت ۱۱۴)( وہ اللہ ہی ہے جس نے تمہاری طرف مفصل کتاب اتاری ہے )  تَفْصِيْلَ الْكِتٰبِ …  (سورہ یونس : ۳۷) کتاب میں تفصیل کردیا ہے ۔  وَتَفْصِيْلَ كُلِّ شَيْءٍ …  (سورہ یوسف ۱۱۱) اور (کتاب میں ) ہر چیز کی تفصیل ہے۔  تِبْيَانًا لِّكُلِّ شَيْءٍ  (سورۃ النحل ۸۹ ) ہر چیز کو کھول کر بیان کرنے والی کتاب ۔

اور قرآن کو علم کی کتاب فرمایا ہے۔  اَنْزَلَہٗ بِعِلْمِہٖ (سورہ النسآء ۱۶۶ )اس کو اتارا اپنے علم کے ساتھ۔  فَصَّلْنٰہُ عَلٰي عِلْمٍ (سورۃ الاعراف ۵۲ )( اس میں ہم نے علم کی تفصیلات دی ہیں) اور یہ بھی بتادیا کہ علم کی باتوں میں تضاد نہیں ہوتا ۔ اَفَلَا يَتَدَبَّرُوْنَ الْقُرْاٰنَ۝۰ۭ وَلَوْ كَانَ مِنْ عِنْدِ غَيْرِ اللہِ لَوَجَدُوْا فِيْہِ اخْتِلَافًا كَثِيْرًا۝۸۲  (سورۃ النساء ) کیا پس تم قرآن کی باتوں پر غور نہیں کرتے اگر وہ اللہ کے سوا کسی اور کا کلام ہوتا تو اس میں اختلاف کثیر (تضاد بیانی ) ضرور ہوتا ۔ اور یہ طمانیت بھی  فرمادی کہ اس میں کوئی غلط بات نہیں ہے ۔

وَلَمْ يَجْعَلْ لَّہٗ عِوَجًا …(سورۃ الکہف ۱ )اور اس میں کسی بھی قسم کی کوئی کجی نہیں رکھی)  اور یہ قطعی اعلان بھی فرمادیا کہ :   اَلْيَوْمَ اَكْمَلْتُ لَكُمْ دِيْنَكُمْ وَاَتْمَمْتُ عَلَيْكُمْ نِعْمَتِيْ وَرَضِيْتُ لَكُمُ الْاِسْلَامَ دِيْنًا۝۰ۭ (سورۃ المائدہ ۔ ۳ )آج میں نے تمہارے لئے تمہارے دین کو مکمل کردیا اور میں نے تم پر اپنی نعمت پوری کردی اور میں نے اسلام ( اطاعت و فرمانبرداری) کو تمہارے لئے طریقہ زندگی کی حیثیت سے پسند کرلیا ۔

اس سے قطعی طور پر ثابت ہے کہ دین میں اب کسی قسم کی کمی یا اضافہ کی قطعاً کوئی گنجائش نہیں ہے۔ ان تیقنات کے ساتھ ساتھ اللہ نے اپنی آخری کتاب کو محمدؐ پر نازل فرماکر آپؐ  کو آخری نبی بنایا ہے اسی لئے آپؐ کو رحمۃ للعٰلمین فرما کر قیامت تک کے لئے ہر قسم کی نبوت کا دروازہ قطعی طور پر بند فرمادیا ۔ آپؐ کے رحمۃ للعٰلمین ہونے کا مطلب یہ ہے کہ قیامت تک پیدا ہونے والے تمام انسانوں کے لئے رحمت الٰہی کا مستحق بننے کا واحد صحیح طریقہ آپ کے ذریعہ ہی بندوں تک پہنچادیا گیا۔ چنانچہ اس کا ثبوت ان آیات سے ملتا ہے :

فَکَیْفَ اِذَا جِئْنَا مِنْ کُلِّ اُمَّۃ ٍ بِشَہِیْدٍ وَّجِئْنَا بِکَ عَلٰی ہٰٓؤُلَاۗءِ شَہِیْدًا۝۴۱ۭ۬ ( النساء)(اس وقت کا تصور کرو جب کہ ہر امت میں سے ہم ایک گواہ کھڑا کریں گے اور ان سب پر (اے نبیؐ ) تم کو گواہ بنائیں گے )

وَيَوْمَ نَبْعَثُ فِيْ كُلِّ اُمَّۃٍ شَہِيْدًا عَلَيْہِمْ مِّنْ اَنْفُسِہِمْ وَجِئْنَا بِكَ شَہِيْدًا عَلٰي ہٰٓؤُلَاۗءِ۝۰ۭ (سورہ نحل ۔۸۹) ( اور جس دن ہم ہر امت میں سے ایک فرد کو جو ان ہی میں کا ہوگا ان پر گواہ ہوگا اور ان تمام گواہوں پر تم کو گواہ بنائیں گے )

مذکورہ بالا دو آیتوں سے صرف نبی کریم ؐ ہی کا آخری نبی ہونا قطعاً ثابت ہے ۔ آپ کے بعد کوئی اور نبی یا آخری نبی مبعوث کیا جانے والاہوتا تو اس کا تذکرہ قرآن میں لازماً ہوتا اور یہ آیتیں ہرگز نازل ہی نہیں ہوتیں کیونکہ تضاد و خلاف بیانی سے قرآن قطعی پاک ہے اس کے علاوہ : قُلْ يٰٓاَيُّھَا النَّاسُ اِنِّىْ رَسُوْلُ اللہِ اِلَيْكُمْ جَمِيْعَا …(سورہ الاعراف ۔۱۵۸)(اے نبی ! اعلان کردیجئے کہ اے تمام انسانو ! میں تم سب کی طرف رسول بناکر بھیجا گیا ہوں ۔ )   وَمَآ اَرْسَلْنٰكَ اِلَّا كَاۗفَّۃً لِّلنَّاسِ بَشِيْرًا وَّنَذِيْرًا (سورہ سباء ۲۸)( اور ہم نے اے نبی ؐ ! آپؐ  کو تمام انسانوں کے لئے خوشخبری دینے اور خبردار کرنے والا بناکر بھیجا ہے۔ ) اس کے علاوہ سورہ النساء آیت ۷۹ ‘ سورہ الحج آیت ۴۹ میں بھی آپ کے آخری نبی ہونے کی بات بیان ہوئی ہے۔ اور  وَلٰكِنْ رَّسُوْلَ اللہِ وَخَاتَمَ النَّـبِيّٖنَ۝۰ۭ (سورہ احزاب ۔۴۰)(مگر وہ (محمدؐ) اللہ کے رسول اور نبیوں کے سلسلے کو ختم کرنے والے ہیں) کے ذریعہ اپنے قانون بعثت انبیاء و رُسل کی منسوخی کا اعلان فرمادیا ۔

ہر قسم کی گمراہی سے بچنے کے لئے یہ وعید بھی سنادی۔  وَمَنْ اَظْلَمُ مِمَّنِ افْتَرٰي عَلَي اللہِ كَذِبًا اَوْ كَذَّبَ بِاٰيٰتِہٖ۝۰ۭ اِنَّہٗ لَا يُفْلِحُ الظّٰلِمُوْنَ۝۲۱ (الانعام ) (اس سے بڑھ کر اور کون ظالم ہوگا جو اللہ پر جھوٹی باتیں گھڑے اور اللہ کی باتوں کو جھٹلائے بلاشبہ ایسا ظلم کرنے والے ہرگز فلاح نہیں پاسکتے ) اس وعید کو بے حد تکرار کے ساتھ بیان کیا گیا ہے۔ مثلاً سورہ الاعراف آیت ۲۷‘ یونس آیت ۱۷‘ ۶۹ اور سورہ ھود آیت ۱۸ میں اس انجا م بد سے بچنے کے لئے ہدایت فرمائی گئی کہ  وَلَا تَقُوْلُوْا عَلَي اللہِ اِلَّا الْحَقَّ۝۰ۭ  (سورہ انساء: ۱۷۱)( اللہ کے متعلق حق کے سوا کوئی بات مت کہو)  اَلْيَوْمَ تُجْزَوْنَ عَذَابَ الْہُوْنِ بِمَا كُنْتُمْ تَقُوْلُوْنَ عَلَي اللہِ غَيْرَ الْحَقِّ وَكُنْتُمْ عَنْ اٰيٰتِہٖ تَسْتَكْبِرُوْنَ۝۹۳ (سورہ انعام) (آج تم کو بدلہ دیا جائے گا دوزخ کے عذاب کا اس وجہ سے کہ تم اللہ کے متعلق غیر حق بات کہتے تھے اوراُس کی آیتوں کے مقابلہ میں اپنی غلط باتوں کو صحیح ثابت کرنے کی کوشش کرتے تھے ۔) اور بتایا گیا کہ شیطان تم کو  اَنْ تَقُوْلُوْا عَلَي اللہِ مَا لَا تَعْلَمُوْنَ (البقرہ ۔۱۶۹) یہ کہ اللہ کے ذمہ وہ باتیں کہو جن کو تم نہیں جانتے ۔) کی باتیں سکھاتا ہے اور اعراف آیت ۳۳  :  قُلْ اِنَّمَا حَرَّمَ رَبِّیَ الْفَوَاحِشَ مَا ظَہَرَ مِنْہَا وَمَا بَطَنَ وَالْاِثْمَ وَالْبَغْیَ بِغَیْرِ الْحَقِّ  (آپ فرمادیجئے کہ میرے رب نے علانیہ اور پوشیدہ ہر قسم کی فحش باتوں کو حرام کردیا ہے )میں اللہ کے متعلق بلا دلیل و بلا سند باتیں کرنے کو حرام قرار دیا گیا ہے۔ اللہ و رسول کی پوری تعلیمات کا واحد مقصد اور نچوڑ بندوں میں ابدی زندگی کی فکر اور انابت الی اللہ یعنی حنیفیت پیدا کرنا ہے ۔

مندرجہ بالا ارشاداتِ الٰہی سے قطعاً ثابت ہوجاتا ہے کہ قرآن کے کسی لفظ یا آیت کا یا کسی حدیث کا کوئی ایسا مفہوم و مطلب ہوہی نہیں سکتا جو پیغمبروں اور عباد الرحمن کے اسوہ اور قرآن کی بنیادی تعلیم کے ضد یا خلاف ہو۔

ان حقائق کے باوجود اللہ و رسول کی تعلیمات سے اگر کوئی غلط معنی و مفہوم لیتا ہو تو اس کے متعلق صرف دو ہی باتیں کہی جاسکتی ہیں ۔ ایک یہ کہ اس کی فہم و فکر نے ٹھوکر کھائی ہے یا وہ نہایت جھوٹا ‘ فریبی اور شیطان ہے۔

یہی وہ حقائق ہیں جن کی بناء پر ہر مسلمان چاہے اس کا تعلق کسی بھی ملک یا کسی بھی قوم سے ہو ‘ یہ ایمان یقین رکھتا ہے کہ قرآن اللہ کی آخری کتاب ہے اور محمد مصطفی ؐ  ‘اللہ کے آخری نبی ہیں کیونکہ آپ کی تعلیمات بھی حفاظت قرآن کے تحت محفوظ ہیں ۔ اس لئے آپ ؐ کے بعد کسی بھی قسم کے نبی کی ضرورت نہیں۔ ان حقائق کے باوجود کسی پر کسی طرح بھی وحی ٔ نبوت نازل ہونے کو ماننا اللہ کو جھوٹا قرار دینا ہے۔

مرزا غلام احمد کے خاندانی حالات

مرزا صاحب کے جدِّ اعلیٰ سمر قند سے دہلی آئے تھے ان کو بہت سے دیہات جاگیر میں دیئے گئے۔ شہنشاہ بابر کے بعد جب مغلیہ سلطنت کمزور ہوگئی تو انھوں نے اپنی فوجی طاقت کو بڑھا کر بہت سے علاقوں کو قبضہ میں کرلیا۔ مرزا صاحب کے پردادا مرزا گل محمد صاحب سکھوں سے بہت سی لڑائیاں لڑیں اور ہر دفعہ کامیاب رہے لیکن ان کے فرزند مرزا عطا محمد صاحب کے ہاتھ سے سوائے قادیان اور چند دیہات کے سارا علاقہ نکل گیا اور سکھوں کے جبر و ظلم سے ان کو اپنا مستقر بھی چھوڑنا پڑا ۔ کافی زمانے کے بعد مرزا صاحب کے والد مرزا غلام مرتضیٰ صاحب دوبارہ قادیان میں جابسے ۔ جن کو ان کے حصہ جدّی سے حکومت برطانیہ نے قادیان اور تین گائوں دیئے ۔ گورنر کے دربار میں ان کو بیٹھنے کے لئے کرسی ملتی تھی جنھوں نے انگریزوں کا حق نمک غدر میں کمپنی کو پچاس 50 گھوڑے سوار مہیا کرکے ادا کیا۔

مرزا صاحب کے دل میں اپنے جَدِّاعلیٰ کی طرح کسی بڑے علاقہ کے رئیس بننے کی تمنا ہونا ایک فطری بات تھی ۔ ہندوستان پر حکومت برطانیہ کا تسلط ہوجانے کے بعد ان کی تمنا کے پورے ہونے کے امکانات قطعی ختم ہوچکے تھے ۔ مرزا صاحب جیسے ذہین و چالاک کے لئے بغیر جدوجہد کئے حالات موجودہ پر قانع ہوجانا ممکن نہ تھا اس لئے انھوں نے سیاسی میدان کے بجائے مذہبی میدان میں اپنی قسمت آزمائی شروع کی ۔ اور یہی ایک ایسا واحد ذریعہ تھا جس سے نہ صرف عزت و شہرت و دولت بلکہ احترام بھی حاصل ہوسکتا تھا ۔ سب سے پہلے ہندوستان کے مذاہب کا تقابلی مطالعہ کیا ۔ بالخصوص خدائی اور نبوت کا دعویٰ کرنے والوں کے حالات اور ان کے ہتھکنڈوں سے خوب آگاہی حاصل کی۔

مرزا صاحب کے کارنامے

مرزا صاحب کے مشاہدہ میں تھا کہ جب بھی کوئی نیا مذہب یا سلسلہ نکلتا ہے تو دیگر مذاہب سے نہ سہی مگر مسلمانوں میں سے کچھ نہ کچھ لوگ اس کی طرف مائل ہو ہی جاتے ہیں اور ایسا ہونا اپنے مذہب سے محض جہل کی بنا پر ہی ہوتا ہے ۔ مرزا صاحب جانتے تھے کہ دیگر مذاہب کے ماننے والوں کے مقابلے میں مسلمانوں کی ایک عظیم اکثریت اپنے دین سے محض کوری ہے ۔ مسلمانوں کی  اس کمزوری سے پوری طرح فائدہ اٹھانے کا انھوں نے فیصلہ کیا ۔ چنانچہ سب سے پہلے سلسلہ قادریہ ‘ چشتیہ کی طرح اپنا ایک نیا سلسلہ عالیہ احمدیہ قائم کیا ۔ اس طرح مسلمانوں میں سے اپنے مرید فراہم کرلئے اور عام مسلمانوں کی ہمدردیاں و عقیدت اور ساتھ ہی دولت حاصل کرنے کے لئے ایک شاطرانہ چال یہ چلی کہ ایک کتاب ’’مسمیٰ بہ براہین احمدیہ علی ٰ حقیقت کتاب اللہ و النبوہ المحمدیہ ‘‘ لکھی جس میں قرآن کے آخری کتاب الٰہی ہونے اور نبی کریم کے آخری نبی ہونے اور مسلمانوں کے اسلام پر ثابت قدمی کی تعریف کرتے ہوئے حسبِ ذیل ایک اشتہار بھی دے دیا :

’’ میں مصنف اس کتاب براہین احمدیہ کا ہوں یہ اشتہار اپنی طرف سے بواعدہ انعام دس ہزار روپے بمقابلہ جمیع ارباب مذاہب وملت کے جو حقانیت قرآن مجید اور نبوت محمدؐ سے منکر ہیں ۔ اتماماً للحجَّۃ شائع کرکے اقرار کرتا ہوں کہ اگر کوئی حسب شرائط مندرجہ اس کو رد کردے تو اپنی جائداد قیمتی دس ہزار روپے پر قبض و دخل دے دوں گا ۔ ‘‘

اور یہ تصریح کی کہ کتاب آریہ برہمو سماج کے خلاف لکھی گئی ہے جو وحی و نبوت کے منکر ہیں جس سے مسلمانوں نے یہ سمجھا کہ مرزا صاحب اسلام کی طرف سے غیر مسلموں سے برسر مقابلہ ہیں چونکہ حریف کو مرعوب کرنے کے لئے لڑائی میں دھوکہ جائز کے تحت خلاف حقیقت واقعہ بیان کردینا شرعاً و عقلاً ناجائز نہیں ہے اس لئے ان کی یہ کتاب ایسی مقبول ہوئی کہ لوگ تین چار روپے والی کتاب کو پچیس پچیس روپے دے کر خریدے ۔ اس کے علاوہ مال دار حضرات نے طباعت کے لئے کثیر رقومات دیں۔ اس طرح مرزا صاحب ایک طرف تو کثیر رقم کے مالک بن گئے دوسرے بہت سے مسلمانوں کو اپنا معتقد بنانے میں کامیاب ہوگئے۔ تیسرے اپنی نبوت کے لئے میدان ہموار کرلیا کہ کسی کو اس کے رد کرنے کا موقع ہی نہ ملا۔ چنانچہ اس میں نفس الہام اور مطلق نبوت کی بحث چھیڑ دی۔ اور وحی نبوت اور الہام کو ایک ہی چیز ثابت کرنے کی کوشش کی ۔ الہام ‘ کشف اور مکالمہ الٰہی کو نبوت کا نام دیا۔ ان کی ان لاف زنیوں کی تردید و نفی اس لئے نہیں کی جاسکتی تھی کہ تصوف اور سلوک اولیائی کے حامل دینی رہنما و بزرگ بھی اپنے صاحبِ الہام و صاحب ِ کشف ہونے اور اللہ سے بات کرنے کے مدعی تھے۔ لیکن ان میں سے کسی نے بھی نبی ہونے کا دعویٰ نہیں کیا۔ مرزا صاحب نے تصوف ‘ سلوک اولیائی کے اصطلاحات کو ذریعہ بناکر دین اسلام کے مسلمہ بنیادی عقائد کو ڈائنمٹ کرنے کی کوشش کی ہے۔ مرزا صاحب کو اچھی طرح معلوم تھا کہ ابتداء ہی میں اگر وہ اپنی مستقل نبوت کا دعویٰ کرتے تو کوئی مسلمان بھی ان کے دعوے کو تسلیم نہیں کرسکتا تھا۔ اس لئے ابتداً ظلی ‘ بروزی کا لبادہ بظاہر اوڑھے رہے اور ان کی مستقل نبوت کی راہ میں جو چیزیں مانع و مزاحم تھیں یعنی قرآن و حدیث اس میں اپنے الہام و کشف کے نام پر من مانی تحریف و تفسیر کرڈالی۔ قرآنی آیات کا حسب مرضی معنی و مفہوم متعین کرنے کے لئے براہین احمدیہ کے صفحہ ۱۳۹ میں یہ قاعدہ لکھا کہ کشف سے معنیٰ قرآن نئے طور پر کھلتے ہیں تو لوگ اس کا انکار کرتے ہیں اور حدیث لانبی بعدی (میرے بعد کوئی نبی نہیں) کے بعد ’’الّا نبی ظلی ‘‘ (سوائے نبی ظلی کے ) بڑھا دیا ۔ اور ساٹھ جزوں پر مشتمل ہزاروں صفحات کی کتاب بنام ’’ازالۃ الاوہام ‘‘ لکھ ڈالی جس میں انھوں نے اپنے آپ کو مسیح موعود ثابت کرنے کی بھرپور کوشش کی ہے اور ان کا یہ دعویٰ دو باتوں پر موقوف تھا ایک عیسیٰ ؑ کی موت کا ثبوت ۔ دوسرا مرزا صاحب کا خدا کی طرف سے مامور ہونا ۔ اس کے لئے مرزا صاحب مفسرین پر بے حد خفا ہیں چنانچہ صفحہ ۷۲۶میں لکھتے ہیں کہ کتاب الٰہی کی غلط تفسیروں نے مولویوں کو بہت خراب کیا ہے۔

جھوٹے نبی سے دلیل پوچھنا یا سننا یا بیان کرنا اگرچہ کفر ہے لیکن عوام کو ان کے فریب سے بچانے کے لئے ان کے دلائل کے غلط و جھوٹ ہونے کو واضح کرنا ضروری ہوتا ہے اس لئے ان کے اہم دلائل کا جائزہ پیش ہے ۔

۱۔  صِرَاطَ الَّذِيْنَ اَنْعَمْتَ عَلَيْہِمْ (سورہ فاتحہ ۔۶) ( ان لوگوں کے راستے پر جن پر تو نے انعام کیا۔) انعام یافتہ بندوں کی تفصیل  وَمَنْ يُّطِعِ اللہَ وَالرَّسُوْلَ فَاُولٰۗىِٕكَ مَعَ الَّذِيْنَ اَنْعَمَ اللہُ عَلَيْہِمْ مِّنَ النَّبِيّٖنَ وَالصِّدِّيْقِيْنَ وَالشُّہَدَاۗءِ وَالصّٰلِحِيْنَ۝۰ۚ وَحَسُنَ اُولٰۗىِٕكَ رَفِيْقًا۝۶۹ۭ (سورہ النساء ) ( جو کوئی اللہ اور رسول ؐ کی اطاعت کرتا رہے گا پس ایسے ہی لوگ آخرت میں ان حضرات کے ساتھ رہیں گے جن پر اللہ نے انعام فرمایا جو نبیوں ‘ صدیقوں ‘ شہداء اور صالحین میں سے ہیں اور جو بہترین ساتھی ہیں۔ )

اس آیت سے مرزا صاحب نے یہ اصول اخذ کیا ہے کہ صدیق کی راہ پر چل کر کوئی بھی صدیق ہوسکتا ہے ‘ شہید کی راہ اختیار کرکے شہید بن سکتا ہے اور صالح کے طریقے کو اپنا کر صالح بننا ممکن ہے بالکل اسی طرح نبی کی راہ پر چل کر کوئی بھی نبی بن سکتا ہے۔

چنانچہ مرزا صاحب کا دعویٰ ہے کہ وہ نبی کی راہ پر چل کر نبی بنے ہیں۔ مرزا صاحب اپنے اس شیطانی اصول کو صرف نبوت کی حد تک ہی محدود نہیں رکھا بلکہ اللہ کی راہ پر بھی چل کر وہ خود اللہ بننے کی بات بھی کہہ چکے ہیں۔ حقیقت واقعہ تو یہ ہے کہ  صِرَاطَ الَّذِيْنَ اَنْعَمْتَ عَلَيْہِمْ (فاتحہ۔۶)  (ان لوگوں کا راستہ جن پر تو نے انعام کیا۔) بندے کی دعا کا ایک جز ہے جس کے ذریعہ بندہ اپنے رب سے التجا کرتا ہے کہ اے رب تیرے انعام یافتہ بندے انبیا ‘ صدیقین ‘ شہداء‘ صالحین جس طرح مرتے دم تک تیری اطاعت کرتے رہے اور آخرت کی فلاح کے لئے دنیا کی ہر تکلیف و نقصان بخوشی برداشت کرتے رہے اور دامے ‘ درمے سخنے تیرے دین کی اشاعت و تبلیغ کرتے رہے دنیا میں اسی طرح زندگی بسر کرنے کی مجھ کو بھی توفیق و ہمت عطا کر۔  وَمَنْ يُّطِعِ اللہَ وَالرَّسُوْلَ فَاُولٰۗىِٕكَ مَعَ الَّذِيْنَ (النساء : ۶۹) (اور جو کوئی اللہ اور اس کے رسول ؐ کی اطاعت کرتا رہے گا پس ایسے ہی لوگ ا ن کے ساتھ رہیں گے۔)  وَحَسُنَ اُولٰۗىِٕكَ رَفِيْقًا(النساء :۶۹) ( اور جو بہترین ساتھی ہیں ) ۔ یہ خط کشیدہ الفاظ علانیہ بتارہے ہیں کہ اللہ و رسول ؐ کی اطاعت کرنے والاآخرت میں اللہ کے انعام یافتہ بندوں کے ساتھ رہے گا نہ کہ وہ انعام یافتہ بندوں کی طرح انعام یافتہ ہوجائے گا ۔ چنانچہ امت محمدیہ ؐ کے سابقون الاولون اور جن کو دنیا ہی میں  رَضِيَ اللہُ عَنْہُمْ وَرَضُوْا عَنْہُ۝۰ۭ ( المائدہ ۱۱۹ ‘ توبہ ۱۰۰ ‘ المجادلہ ۲۲‘ البینہ ۸) جن سے اللہ دنیا میں راضی ہوگیا اور وہ اللہ سے راضی ہوگئے۔) کی خوشخبری سنادی گئی تھی۔

ان میں سے کسی نے بھی یہ نہیں کہا کہ میں صدیق ہوں ‘ شہید ہوں ‘ صالح ہوں یا ہوگیا ہوں کیونکہ اس کا فیصلہ اللہ تعالیٰ ان کے اعمال کے لحاظ سے حشر کے دن فرمائے گا نہ کہ دنیا میں اور نہ اس کا فیصلہ کرنا بندوں کے اختیار میں ہے چنانچہ یہ حضرات مرتے دم تک معافی اور بخشش کی درخواست ہی کرتے رہے۔ لیکن نبی کا معاملہ بالکل اس کے برخلاف ہے کیونکہ دنیا ہی میں اسے نبی کی حیثیت سے مبعوث کیا جاتا ہے اور نبوت اعمال کی بناء پر نہیں ملتی بلکہ اللہ تعالیٰ اپنے علم و حکمت کے تحت عطا فرماتا ہے۔ اس لئے نبی کی راہ اختیار کرکے نبی بن جانے کی بات محض شیطانی بات ہے۔

ساہ لوحی ملاحظہ ہو کہ جس اصول سے مرزا صاحب نبی بننے کے دعویدار ہیں اس کو صرف اپنی ذات تک محدود رکھ کر آئندہ کے لئے منسوخ قرار دے دیا ۔ اس طرح اپنے اخذ کردہ اصول کے غلط و جھوٹ ہونے کو خود ہی ثابت کردیا ۔ اس طرح خود اپنے دعویٔ نبوت میں جھوٹے ہونے کا ثبوت فراہم کردیا۔

(۲) نبی کریم ؐ کے بعد بھی نبوت کا سلسلہ جاری رہنے کے سلسلہ میں  يٰبَنِيْٓ اٰدَمَ اِمَّا يَاْتِيَنَّكُمْ رُسُلٌ مِّنْكُمْ يَـقُصُّوْنَ عَلَيْكُمْ اٰيٰتِيْ۝۰ۙ … (سورہ اعراف : ۳۵) ’’اے اولادِ آدم ! جب کبھی تمہارے لئے رسول کی ضرورت ہوگی وہ تم ہی میں سے تمہارے پاس آتے رہیں گے ۔ میرے احکام تم سے بیان کرتے رہیں گے۔‘‘ پیش کی جاتی ہے اور مطلب یہ لیا جاتا ہے کہ جب تک بنی آدم دنیا میں موجود رہیں گے ان میں بگاڑ پیدا ہوتا رہے گا جس کی اصلاح کے لئے رسول مبعوث کئے جاتے رہیں گے ۔ یہ قطعاً غلط اور تفسیر بالرائے ہے۔ کیونکہ اس آیت کا تعلق بندوں کے اپنے پیدا کردہ بگاڑ سے نہیں ہے بلکہ اللہ و رسول کی تعلیمات کے بگڑ جانے سے ہے جس کو  فَاِمَّا يَاْتِيَنَّكُمْ مِّـنِّىْ ھُدًى فَمَنْ تَبِــعَ ھُدَاىَ فَلَا خَوْفٌ عَلَيْہِمْ وَلَا ھُمْ يَحْزَنُوْنَ۝۳۸ (سورہ البقرہ) ( بس جب کبھی تم کو ہدایت کی ضرورت ہوگی تو تمہارے پاس میری طرف سے ہدایت آتی رہے گی پس جو کوئی میری ہدایت کی پیروی کرے گا بس ایسوں ہی کے لئے نہ کوئی خوف ہوگا اور نہ وہ غمگین ہوں گے ) میں بھی بیان کیا گیا ہے جس میں لفظ رسول کی بجائے ھدًی آیا ہے ۔ یہ دونوں آیات جو ایک دوسرے کی تفسیر ہیں ‘ کا تعلق نفسِ دین کی اصل و صحیح تعلیمات بگڑ کر بالکلیہ مسخ ہوجانے سے ہے ۔ دین کے معاملہ میں بندوں میں پیدا ہونے والے بگاڑ سے نہیں۔

کتاب و رسولؐ کی تعلیمات اپنی اصلی شکل و صورت میں موجود ہونے کے باوجود شرک و بدعات کے ذریعہ بندے اپنے اندر جب بگاڑ پیدا کرلیتے ہیں تو اس کی اصلاح علماء دین کرتے ہیں جس پر ان کو مجدّد کہا جاتا ہے ۔ ایسے بگاڑ کی اصلاح کے لئے رسول کی ضرورت ہی نہیں ۔ چنانچہ اللہ کے رسولؐ  کا فرمان ہے’’العلماء الامتی کانبیاء بنی اسرائیل  ‘‘ (میری امت کے علماء بنی اسرائیل کے انبیاء کے مانند ہیں ) یعنی علماء اللہ و رسول ؐ کی صحیح تعلیمات کی روشنی میں بگاڑ کی نشاندہی کرتے ہوئے لوگو ں کو اپنی اصلاح کرلینے کی دعوت دیں گے۔

اِذْ قَالَ اللہُ يٰعِيْسٰٓى اِنِّىْ مُتَوَفِّيْكَ وَرَافِعُكَ اِلَيَّ …(سورہ  اٰل عمران ۔۵۵) ( اور جب اللہ نے کہا اے عیسیٰ ؑ بے شک میں تم کو وفات دینے والا ہوں اور میں تم کو اپنی طرف اٹھانے والا ہوں۔) یہاں متوفیک و رافعک دونوں اسمِ فاعل ہیں جن کے درمیان ’و‘ ہے۔ اس سے ترتیب پر استدلال کرنا صحیح نہیں یعنی پہلے موت بعد رفع کی دلیل پیش کرنا صحیح نہیں ۔ کیونکہ ’و‘ سے جو عطف ہے اس میں ترتیب لازمی نہیں ہوتی چنانچہ سورہ انعام آیت  ۸۴ تا ۸۶ میں اٹھارہ پیغمبروں کے نام ’ و ‘ کے عطف کے ساتھ آئے ہیں ۔ لیکن ان میں ترتیب زمانی نہیں ہے ۔ چنانچہ ابن عباسؓ سے بھی اس آیت کے معنوں میں تقدیم و تاخیر یعنی پہلے رفع کا عمل بعد میں وفات کا عمل ہونا منقول ہے ۔ چنانچہ سورہ مائدہ میں حشر کے دن عیسیٰ ؑ صرف  تَوَ فَّیْتَنِیْ (تو نے مجھے وفات دی ) فرمائیں گے جس سے قطعی ثابت ہے کہ وفات کا عمل رفع کے بعد ہوا نہ کہ وفات کے بعد رفع ۔ چنانچہ عیسیٰ ؑ کا ان کی وفات سے پہلے اٹھائے جانے کا ذکر سورہ النساء کی حسبِ ذیل آیت میں ہے :

وَقَوْلِـہِمْ اِنَّا قَتَلْنَا الْمَسِيْحَ عِيْسَى ابْنَ مَرْيَمَ رَسُوْلَ اللہِ۝۰ۚ وَمَا قَتَلُوْہُ وَمَا صَلَبُوْہُ وَلٰكِنْ شُـبِّہَ لَہُمْ۝۰ۭ وَاِنَّ الَّذِيْنَ اخْتَلَفُوْا فِيْہِ لَفِيْ شَكٍّ مِّنْہُ۝۰ۭ مَا لَہُمْ بِہٖ مِنْ عِلْمٍ اِلَّا اتِّبَاعَ الظَّنِّ۝۰ۚ وَمَا قَتَلُوْہُ يَقِيْنًۢا۝۱۵۷ۙ (سورہ النساء)  ( ان کا یہ کہنا کہ یقیناً ہم نے اللہ کے رسول مسیح عیسیٰ ؑ ابن مریم کو قتل کرڈالا ( صحیح نہیں ) کیوں کہ انھوں نے نہ ان کو قتل کیا اور نہ ان کو سولی پر چڑھایا بلکہ ان کو اشتباہ (شبہ) ہوگیا اور بلا شبہ جو لوگ اس معاملہ میں اختلاف کرتے ہیں وہ غلط خیال میں ہیں اور ان کے پاس اس کے لئے کوئی دلیل نہیں بجز قیاس و گمان کے ۔ بَلْ رَّفَعَہُ اللہُ اِلَيْہِ۝۰ۭ وَكَانَ اللہُ عَزِيْزًا حَكِـيْمًا۝۱۵۸ (سورہ النساء ) (اور یقیناً انھوں نے ان کو قتل نہیں کیا بلکہ اللہ نے ان کو اپنی طرف اٹھالیا کیونکہ اللہ تعالیٰ بڑے زبردست حکمت والے ہیں ۔ )

رفع کا لفظ قرآن میں اوپر اٹھانے کے معنی میں آیا ہے ملاحظہ ہو سورہ البقرہ آیت ۶۳ ‘ ۹۳ ‘ سورہ النساء ۱۵۴‘ اعراف ۱۷۱ ۔ لفظ رفع کے معنی ’باعزت موت ‘کے کرنا لغت کی کسی کتاب سے بھی ثابت نہیں۔ اور عیسیٰ ؑ کے وفات پانے سے پہلے تمام اہلِ کتاب آپ پر ایمان لائیں گے ‘کی بات بھی فرمائی گئی ہے ۔ جیسا کہ ارشاد باری تعالیٰ ہے : وَاِنْ مِّنْ اَہْلِ الْكِتٰبِ اِلَّا لَيُؤْمِنَنَّ بِہٖ قَبْلَ مَوْتِہٖ۝۰ۚ وَيَوْمَ الْقِيٰمَۃِ يَكُوْنُ عَلَيْہِمْ شَہِيْدًا۝۱۵۹ۚ (سورہ النساء) (اور اہل کتاب کا ہر فرد عیسیٰ ؑ کی موت سے پہلے آپ پر ایمان لے آئے گا اور قیامت کے دن عیسیٰ ؑ ان پر گواہ ہوں گے۔)یہا ں ’ ہ ‘ سے مراد اہل کتاب کا فرد نہیں بلکہ عیسیٰ ؑ مراد ہیں ۔ اس کے علاوہ سورہ زخرف آیت ۶۱ میں عیسیٰ ؑ کو   وَاِنَّہٗ لَعِلْمٌ لِّلسَّاعَۃِ (اور بلا شبہ وہ ( عیسیٰ ؑ ) قیامت کے لئے یقینی ایک نشان ہے ) قرار دیا گیا ہے کہ جس سے قیامت کے قریب آپ کا آسمان سے نازل ہونے کی بات ہی صحیح معلوم ہوتی ہے ۔ مزید یہ کہ  وَيُكَلِّمُ النَّاسَ فِي الْمَہْدِ وَكَہْلًا وَّمِنَ الصّٰلِحِيْنَ۝۴۶ (سورہ  اٰل عمران) ’’ اور وہ لوگوں سے بات کرے گا گہوارہ میں بھی اور ادھیڑ عمر میں بھی اور وہ صالحین میں سے ہوگا ‘‘کی اطلاع دی گئی ہے۔ گہوارہ میں بات کرنے کی بات تو ایک مسلمہ ہے لیکن ’کَھل ‘ عمر میں لوگوں سے بات کرنا ابھی  باقی ہے کیونکہ  آپ ۲۵ سال کی عمر میں اوپر اٹھالئے گئے ۔ کھل چالیس سال کی عمر کو کہا جاتا ہے جس سے یہ معلوم ہوجاتا ہے کہ آپ دوبارہ آسمان سے نازل ہوکر ادھیڑ عمر کو پہنچیں گے اور لوگوں سے خطاب کریں گے۔

۴۔ مَا الْمَسِيْحُ ابْنُ مَرْيَمَ اِلَّا رَسُوْلٌ۝۰ۚ قَدْ خَلَتْ مِنْ قَبْلِہِ الرُّسُلُ۝۰ۭ (المائدہ : ۷۵)  ’’مسیح ابن مریم اللہ کے ایک رسول کے سوا کچھ بھی ( اللہ کا بیٹا ) نہیں ۔ تحقیق ان سے پہلے بہت سے پیغمبر گزر چکے ہیں۔ ‘‘

خط کشیدہ الفاظ سے عیسیٰ ؑ کے وفات پاچکنے کی بات کہنا غلط ہے کیونکہ یہاں آپ کی وفات پانے کو بیان کرنا نہیں بلکہ اللہ کا بیٹا ہونے کے عقیدہ کی تردید کی گئی ہے ۔ خط کشیدہ الفاظ سورہ آل عمران آیت ۴۴ میں بھی نبی کریم ؐ کے تعلق سے آئے ہیں جو جنگ احد پر تبصرہ کے سلسلہ میں نازل ہوئے ہیں ۔ ان کے نزول کے وقت آپؐ زندہ تھے اور مزید سات سال تک زندہ رہے ۔ یہ الفاظ نبی کریم ؐ کے وفات پانے کے سلسلہ میں پیش کرنا جس طرح صحیح نہیں اسی طرح عیسیٰ ؑ کے وفات پاچکنے کے ثبوت میں پیش کرنا صحیح نہیں ہوسکتا۔

عیسیٰ ؑ کی پیدائش عام قانون طبعی کے خلاف ہوئی ہے اور آپ کو جو معجزے دیئے گئے وہ کسی اور پیغمبر کو نہیں دیئے گئے ۔ اسی طرح آپ کا آسمان پر اٹھالیا جانا اور قیامت کے قریب نازل ہونا ‘ ایک خصوصی معاملہ ہے جس کا تعلق اللہ کی قدرت سے ہے اور اللہ کی قدرت زیر بحث نہیں آسکتی ۔ سنت الٰہی اور قدرت الٰہی کو ایک سمجھنا صحیح نہیں ۔ بیک نظر سچ و جھوٹ معلوم ہوجانے کیلئے جدول پیش ہے۔

 جیسا کہ مسلمانوں پر ظاہر ہے اور ہمارے رسول ؐ کے بعد نبی کیوں کر آسکتا ہے ۔ درآں حال یہ کہ آپ کی وفات کے بعد وحی منقطع ہوگئی اور اللہ تعالیٰ نے آپ پر نبیوں کا خاتمہ فرمادیا ‘‘۔ (حمامۃ البشریٰ صفحہ ۳۴) ’’مجھے کب جائز ہے کہ میں نبوت کا دعویٰ کرکے اسلام سے خارج ہوجائوں اور کافروں کی جماعت سے جاملوں۔‘‘(حمامۃ البشریٰ صفحہ ۹۶)

مسلمانوں اور قادیانیوں میں فرق و اختلاف

نزول کتاب و بعثت انبیاء کا مقصد

پیغمبر کی بعثت اور کتاب کے نزول کا مقصد بندوں کے لئے سامان ہدایت فراہم کرنا ہے ۔ کتاب کے نزول کیلئے پیغمبر کی ضرورت اس لئے ہے کہ وہ کلام الٰہی سے منشا و مراد الٰہی کو بتائے اور احکام الٰہی پر عمل کرکے نمونہ بندگی انسان کے سامنے رکھ دے تاکہ بندے اختلاف و انتشار سے بچ سکیں اور حشر کے دن سامان ہدایت کی عدم فراہمی کا عذر بھی پیش نہ کرسکیں۔

بعثت انبیاء کا قانون الٰہی

کسی قوم یا ملک میں پیغمبر مبعوث نہ کیا گیا ہو اور اس تک کسی اور قوم یا ملک سے ہدایت الٰہی نہ پہنچ سکی ہو تو نبی مبعوث کرکے کتاب نازل کی جاتی ہے یا کتاب تو نازل ہوئی تھی لیکن انسانوں نے اپنے خیالات اورمو شگافیوں سے اس کو بدل دیا ہو یا نبوی تعلیم و اسوہ اس قدر بگڑ چکا ہو کہ اس کی اصلی صورت و شکل معلوم کرنا جب ممکن نہ رہا تو نبی مبعوث کیا گیا ہے ۔ جیسے بنی اسرائیل یا کافروں نے کتاب ِ الٰہی کو گم کردیا تو نبی مبعوث کیا گیا جو امّت کے لئے کتاب از سر نو مدون کئے۔ جیسے بنی اسرائیل یا کسی نبی کی مدد کے لئے ایک اور نبی مبعوث کیا گیا  جیسے موسیٰ  ؑ کی مدد کے لئے ہارون ؑ اور یحییٰ ؑ و عیسیٰ ؑ ۔

نزول کتاب و بعثت نبی کا ایک اور اہم و بنیادی مقصد انسانوں کے لئے ایک برادری (امۃ واحدہ ) بننے کا سامان فراہم کرنا ہے ۔ چنانچہ جب بھی کوئی کتاب نازل ہوئی یا نبی مبعوث ہوئے تو  مُصَدِّقَ لِّمَا بَیْنَ یَدَیْہِ ’’ تصدیق کرنے والا اس کا جو کچھ ان کے پاس پہلے سے ہے ‘‘ کے اعلان کے ساتھ ہوئے ہیں۔ یہ اعلان قرآن میں بار بار دہرایا گیا ہے ۔ اسی لئے اللہ کے تمام پیغمبروں اور تمام کتابوں کو ماننا مسلمانوں کے ایمان کی ایک اہم شرط ہے ۔ اور اللہ کی کسی بھی کتاب یا کسی بھی پیغمبر کا انکار کرنا گویا تمام کتب و تمام پیغمبروں کا انکار کرنا قرار دیا گیا ہے ۔ اس لحاظ سے نبی کو ماننے اور نہ ماننے کا معاملہ نہایت ہی اہم و بنیادی معاملہ ہے جو بے حد نازک ہونے کے ساتھ ساتھ شدید نتائج کا حامل ہے ۔ چنانچہ اللہ کے نبی کو ماننے والا مومن ( اگر اس میں برائیاں نہ ہوں تو ) جنتی ۔ اور انکار کرنے والا کافر چاہے اس میں کتنی ہی دوسری خوبیاں کیوں نہ ہوں دوزخی ۔ اسی طرح جھوٹے نبی کو ماننے والا کافر و دوزخی چاہے وہ کتنا ہی پارسا کیوں نہ ہو اور جھوٹے نبی کا انکار کرنے والامومن اگر فرمانبردار ہو تو جنتی ۔ جس سے ثابت ہوا کہ سچے جھوٹے نبی کو ماننے کا معاملہ انسانوں کی ابدی زندگی کا معاملہ ہے ۔ اس کی اسی اہمیت کی بنا پر ہر نبی اپنے بعد آنے والے نبی کی خوشخبری اپنی اپنی امتوں کو دیئے ہیں۔ چنانچہ آخری نبی کی بعثت سے متعلق موسیٰ  ؑ اور عیسیٰ ؑکی دی ہوئی خوشخبریاں توریت و انجیل کے محرف ہوجانے کے باوجود اب بھی موجود ہیں۔ اور عیسیٰ ؑاپنی امّت کو آخری نبی کی خوشخبری دیئے ہیں۔ وہ قرآن میں ہے ۔  وَاِذْ قَالَ عِيْسَى ابْنُ مَرْيَمَ يٰبَنِيْٓ اِسْرَاۗءِيْلَ اِنِّىْ رَسُوْلُ اللہِ اِلَيْكُمْ مُّصَدِّقًا لِّمَا بَيْنَ يَدَيَّ مِنَ التَّوْرٰىۃِ وَمُبَشِّرًۢا بِرَسُوْلٍ يَّاْتِيْ مِنْۢ بَعْدِي اسْمُہٗٓ اَحْمَدُ۝۰ۭ (الصف ۔ ۶) ’’ اور جب عیسیٰ ؑ ابن مریم نے بنی اسرائیل سے کہا اے بنی اسرائیل بلا شبہ میں تمہاری طرف اللہ کا رسول ہوں مجھ سے پہلے توریت آچکی ہے اس کی تصدیق کرنے والا ہوں اور میرے بعد صرف ایک ہی رسول آنے والے ہیں جن کا نام احمد ہوگا میں ان کی بشارت دینے والا ہوں ۔‘‘ ملحوظ رہے کہ عیسیٰ ؑ کی اس بشارت میں سابقہ پیغمبروں کی تصدیق اور آنے والے پیغمبر کی خوشخبری موجود ہے ۔ اس قانون کی رو سے قرآن کے بعد کوئی اور کتاب نازل اور نبی کریم ؐ کے بعد کوئی اور نبی کو مبعوث کرنا ہوتا تو اس کا ذکر قرآن میں ہونا ضروری تھا ۔ اور نبی کریم ؐ کے ارشادات میں بھی ضرور اس قسم کی پیشین گوئی ہوتی ۔ حقیقت واقعہ تو یہ ہے کہ اللہ تعالیٰ نے حفاظت کا وعدہ فرما کر قرآن کو آخری کتاب قرار دے دیا ۔ اور نبی کریم ؐ  کو ’’رحمت للعٰلمین ‘‘ اور ’’ خاتم النبیین ‘‘ کا خطاب نہیں بلکہ لقب دے کر اپنی بعثت انبیاء کی سنت کو منسوخ فرمادیا۔ اور نبی کریم ؐ نے اپنے ارشادات ’’لانبی بعدی‘‘ کے علاوہ دیگر ارشادات کے ذریعہ یہ صراحت و وضاحت فرمادی ہے کہ میرے بعد ہر دعویدار نبوت چاہے وہ ظلی ہو یا بروزی ‘ امتی ہو یا غیر امتی یقیناً جھوٹا و فریبی ہے ۔ جیسا کہ عرض کیا گیا ہے کہ نزول کتب و بعثت انبیاء کے ذریعہ تمام انسانوں میں اتحاد و اتفاق (عقیدہ و عمل کی یکسانیت ) پیدا کرکے ایک برادری بننے کا سامان فراہم کرنا ہے ۔ چنانچہ دینِِ اسلام کی ایک اہم و بنیادی دعوت بھی یہی ہے کہ دنیا کے تمام انسانوں کی نسل و اصل ایک ‘ ان کی ضروریات و خواہشات بھی ایک اور ان کا پیدا کرنے اور پالنے والا بھی ایک ہی ہے جس کا لازمی تقاضہ یہی ہے کہ دنیا کے تمام انسانوں کے لئے طریقہ بندگی و زندگی بھی ایک ہی ہو نا چاہئے جو رب العالمین کا مجوّزہ ہونا چاہئے ۔ یہی وجہ ہے کہ دین اسلام پوری انسانیت کا دین بنتا جارہا ہے جس کی رفتار کبھی سست تو کبھی تیز ہوجاتی ہے ۔ العلیم ‘ الحکیم ‘ رئوف و رحیم ‘ سبحان ‘ رب العالمین کی ہر گز ہرگز یہ شان نہیں کہ بلا وجہ وبلا ضرورت نبی کو مبعوث کرکے نہ صرف بندوں کو ایمان و کفر کی کڑی آزمائش میں ڈالے بلکہ ان تمام امکانات کو بھی ڈائنامیٹ کردے جو آخری کتاب اور آخری نبی کے ذریعہ انسانوں کو ایک امت و برادری بننے کے لئے پیدا ہوچکے ہیں۔

غور کیجئے قرآن کا آخری کتاب ہونا اور محمد مصطفی ؐ کا آخری نبی ہونا اللہ کی کس قدر زبردست رحمت و نعمت ہے جس کی بدولت ہی دنیا کے تمام مسلمان ایک دائمی و عالمگیر برادری بنے ہیں اور بنتے جارہے ہیں ۔ دشمنانِ اسلام ‘ دین اسلام کی اسی آفاقیت میں رخنہ ڈالنے ( یصدون عن سبیل اللہ ) ( اللہ کے راستے سے روکتے ہیں ) کی غرض سے رہ رہ کر اپنی سی کوشش کرتے رہے ہیں ۔ مرزا صاحب کا دعویٔ نبوت بھی اسی مقصد (  یصدون عن سبیل اللہ )کے حصول کی ایک کوشش ہے ۔ مرزا صاحب اپنے خود ساختہ اصول اور اپنے کشف و الہام کی بنیاد پر اپنی نبوت کا دعویٰ کیا ہے ۔ حالانکہ یہ بنیادیں ان کے دعوے کی دلیل نہیں بن سکتیں ان کا دعویٰ ایسا ہی ہے جیسے زید ‘ بکر سے مطالبہ کرے کہ تم نے جو قرض مجھ سے لیا ہے وہ واپس کردو کیونکہ یہ بات مجھ پر منکشف ہوئی ہے یا یہ کہے کہ مجھے الہام کے ذریعہ یہ معلوم ہوا ہے کہ تمہارے ذمہ میری اتنی رقم واجب الادا ہے ۔ اسی لئے انھوں نے قرآن و حدیث کے خلاف اپنے الہام و کشف کی آڑ میں ان کی من مانی تفسیر کرڈالی جو ہزاروں صفحات پر مشتمل ہے ۔ ان کے جھوٹ و فریب کو بتانے کے لئے بھی ہزاروں صفحات درکار ہوں گے جن کا پڑھنا عوام کے لئے ممکن بھی نہیں اس لئے سہولت و آسانی کے لئے مرزا صاحب کے وہ عقائد جو وہ اللہ تعالیٰ کے متعلق رکھتے تھے ‘ ان کے چند نمونے پیش ہیں۔

۱۔ اللہ تعالیٰ نے مرزا صاحب سے کہا ’’ میں نماز پڑھوں گا ‘ روزہ رکھوں گا ‘ جاگتا ہوں اور سوتا ہوں ۔ (الہامات مرزا صاحب ۔ البشریٰ جلد دوم صفحہ ۷۹)

۲۔ تو مجھ سے بمنزلہ میرے فرزند کے ہے ۔  ( حقیقت الوحی ۔ صفحہ ۸۶)

۳۔  تو مجھ سے ہے اور میں تجھ سے ہوں ‘ تیرا ظہور میرا ظہور ہے ۔ ( مکاشفات مرزا صاحب ۔ صفحہ ۶۵)

۴۔ میں تیری حفاظت کروں گا خدا تیرے اندر اتر آیا تو مجھ میں اور تمام مخلوقات میں واسطہ ہے ۔ (کتاب البریہ صفحہ ۷۵)

۵۔ مسیح موعود ( مرزا صاحب ) ایک موقع پر اپنی یہ حالت ظاہر فرمائی کہ کشف کی حالت آپ پر اس طرح طاری ہوئی کہ گویا آپ عورت ہیں اور اللہ تعالیٰ نے رجولیت کی قوت کا اظہار فرمایا ۔ ( اصلاحی قربانی صفحہ ۱۳۴ قاضی یار محمد قادیانی )

۶۔ مرزا صاحب نے کہا ’’ میں نے خواب میں دیکھا کہ میں خدا ہوں ۔ میں نے یقین کرلیا کہ میں وہی ہوں (آئینہ کمالات اسلام ۵۶۴ مصنفہ مرزا صاحب )

غور کیجئے کہ مرزا صاحب نے اللہ تعالیٰ کے ارشادات  لَیْسَ کَمِثْلِہٖ شَیْئٌ (شوریٰ ۔ ۱۱) ’’نہیں ہے اس طرح کا سا کوئی‘‘  اَللّٰہُ الصَّمَدٌ ’’اللہ ہر ایک سے بے نیاز ہے‘‘   لَقَدْ كَفَرَ الَّذِيْنَ قَالُوْٓا اِنَّ اللہَ ہُوَالْمَسِيْحُ ابْنُ مَرْيَمَ۝۰ۭ (المائدہ ۔ ۷۲)’’ یقیناً کفر کیا ان لوگوں نے جو یہ کہتے ہیں کہ اللہ تعالیٰ عین مسیح ابن مریم ہے۔ ‘‘ لَمْ يَلِدْ۝۰ۥۙ وَلَمْ يُوْلَدْ۝۳ۙ  وَلَمْ يَكُنْ لَّہٗ كُفُوًا اَحَدٌ۝۴ۧ  (اخلاص )’’نہ اس نے کسی کو جنا اور نہ اسے کسی نے جنا اور جس کے جوڑ کا کوئی نہیں‘‘  اَنّٰى يَكُوْنُ لَہٗ وَلَدٌ وَّلَمْ تَكُنْ لَّہٗ صَاحِبَۃٌ۝۰ۭ  (الانعام : ۱۰۱ )’’ اللہ کو اولاد کیونکر ہوسکتی ہے جب کہ اس کی کوئی بیوی ہے ہی نہیں‘‘  سُبْحٰنَہٗ وَتَعٰلٰى عَمَّا يَصِفُوْنَ (الانعام : ۱۰۰)’’ وہ پاک اور برتر ہے ان تمام باتوں سے جو اس کی شان کے خلاف لوگ بیان کرتے ہیں ‘‘ کا کس طرح مذاق اڑایا ہے۔ جس کا اللہ رب العزت سے بے خوفی کا یہ عالم ہو تو اس کو ’’انا النبی ‘‘( میں نبی ہوں ) کہنے سے کیا چیز روک سکتی ہے۔

انسان کے دل و دماغ میں جب دنیا رچ بس جاتی ہے تو وہ  اَسْفَلَ سٰفِلِيْنَ (سورہ التین ۔۵)’’پستی کی حالت سے بھی زیادہ پست تر‘‘سے بھی آگے بڑھ کراپنے رب کا باغی و سرکش بننے میں شیطان کو بھی مات کردیتا ہے۔

مرزا غلام احمد احب کی تصانیف کی روشنی میں اگر یہ کہا جائے کہ وہ اللہ کے وجود ہی کو نہیں مانتے تھے تو یہ ایک حقیقت واقعہ کا اظہار ہی ہوگا۔ جس کا ایک کھلا ثبوت ان کا حشر سے انکار ہے۔

وَمَا عَلَیْنَا اِلَّا الْبَلاَ غ

جناب مرزا طاہرؔ احمد صاحب

السلام علیٰ من التبع الھدیٰ

(سلامتی اس کے لئے ہے جو ہدایت کی پیروی کرے)

آپ کی طرف سے جاری کردہ مباہلہ والاکتابچہ وصول ہوا ۔ اللہ تعالیٰ نے اپنی کتاب ’’قرآن کی سورۃ  اٰل عمران آیت ۶۱ میں مباہلہ کرنے کی جو ہدایت دی ہے وہ عیسائیوں کے مقابلہ میں ہے یعنی مباہلہ صرف ان ہی سے کیا جاسکتا ہے جو کسی نہ کسی درجہ میں عذاب الٰہی سے ڈرنے والے اور حشر و نشر ‘ جزا و عذاب ‘ مغفرت و نجات کو ماننے والے ہوں ۔ اس لئے ایسے لوگوں سے مباہلہ نہیں کیا جاسکتا جو جان بوجھ کر انتہائی ڈھٹائی کے ساتھ فریب و جھوٹ کے ذریعہ مسلمانوں کے اتفاق و اتحاد کو ڈائنمٹ کرنے کی کوشش میں لگے ہوئے ہیں۔

قرآن و حدیث اور اسوہ صحابہؓ کی رو سے ہر مسلمان قرآن کو اللہ کی آخری کتاب (قیامت تک کے پیدا ہونے والے تمام انسانوں کے لئے کتاب ہدایت ) اور محمد مصطفی صلی اللہ علیہ وسلم کو خاتم النبین اور آخری رسول ( قیامت تک پیدا ہونے والے تمام انسانوں کے لئے اللہ کی بندگی کا کامل نمونہ ) مانتا ہے جس سے خود بخود ثابت ہے کہ اب کسی قسم کے (ظلی یا بروزی ) نبی کی قطعاً کوئی ضرورت ہی نہیں ہے ۔ سرے سے جب کسی نبی و رسول کی ضرورت ہی نہیں تو محمد مصطفی صلی اللہ علیہ وسلم کے بعد ہر دعویدار نبوت لازماً و قطعاً جھوٹا ‘ فریبی و دجّال ہے ۔ اور جھوٹے نبی کو ماننے والوں کا بھی جھوٹا ‘ فریبی اور فسادی ہونا ایک یقینی بات ہے اس لئے ایسوں سے مباہلہ کرنا اپنے ہی مسلمات کے غلط و جھوٹ ہونے پر خود ہی مہر تصدیق ثبت کرنا ہے۔

کتابچہ کے ذریعہ اور اس میں  لعنۃ اللہ علی الکٰذبین کی تکرار سے ذہن کو اصل مسئلہ سے ہٹانے اور اپنی سچائی کا تاثر دینے کے لئے آپ نے جو چال چلی ہے وہ شیطان کو بھی مات کردیتی ہے ۔ مگر خوب یاد رکھئے کہ سچوں کو جھوٹا کہنے والے خود ہی اللہ کی لعنت میں گرفتار ہوجاتے ہیں اور اللہ تعالیٰ کی لعنت کا خوف صرف ان ہی کو ہوتا ہے جو اللہ تعالیٰ پر صحیح معنوں میں ایمان رکھتے ہیں ۔

آپ کے پیر و مرشد بانی ٔ جماعت احمدیہ مرزا غلام احمد صاحب کا برسرِ باطل ‘ کذّاب و دجّال ہونا خود ان کی اپنی دعا و طلب کے مطابق ثابت ہوچکا ہے جو ایک تاریخی حقیقت بن چکی ہے۔ ( جس کی تفصیل درج ذیل ہے ) اس کے باوجود آپ کا چیلنج مباہلہ دینا ایسا ہی ہے جیسا کہ کسی کے جھوٹے ہونے کے کھلے و ٹھوس ثبوت موجود ہونے کے باوجود اس کا اپنی سچائی کے ثبوت میں مباہلہ کا چیلنج دینا ہے۔ آپ کے پیر و مرشد غلام احمد صاحب نے ۲۵ ؍ اپریل  ۱۹۰۷  ؁ء کو حسبِ ذیل اشتہار جناب ثناء اللہ صاحب امرتسری کو بھیجتے ہوئے اس کی  اشاعت کے لئے بھی کہا تھا :

اشتہار

بسم اللہ الرحمن الرحیم

نحمدہٗ و نصلی علیٰ رسولہ الکریم

یَسْتَنْبِئُوْنَـکَ اَحَقٌ ھُـوَط قُلْ اِیْ وَ رَبِّی اِنَّہٗ لَحَقٌّ ط

بخدمت مولوی ثناء اللہ صاحب ۔  السلام علی من التبع الھدیٰ

مدّت سے آپ کے پرچہ ’’اہل حدیث ‘‘ میں میری تکذیب اور تفسیق کا سلسلہ جاری ہے۔ ہمیشہ مجھے آپ اپنے اس پرچہ میں مردود ‘ کذّاب ‘ دجّال ‘ مفسد کے نام سے منسوب کرتے ہیں اور دنیا میں میری نسبت شہرت دیتے ہیں کہ یہ شخص مفتریٰ اور کذاب اور دجال ہے اور اس شخص کا دعویٰ مسیح موعود ہونے کا سراسر افتریٰ ہے ۔ میں نے آپ سے بہت دکھ اٹھایا اور صبر کرتا رہا ۔ مگر چونکہ میں حق کے پھیلانے کے لئے مامور ہوںاور آپ بہت سے افترا میرے پر کرکے دنیا کو میری طرف آنے سے روکتے ہیں اور مجھے ان گالیوں اور ان تہمتوں اور ان الفاظ سے یاد کرتے ہیں جن سے بڑھ کر کوئی لفظ سخت نہیں ہوسکتا ۔ اگر میں ایسا ہی کذاب اور مفتریٰ ہوں جیسا کہ اکثر اوقات آپ اپنے ہر ایک پرچہ میں مجھے یاد کرتے ہیں تو میں آپ کی زندگی ہی میں ہلاک ہوجائوں گا۔ کیونکہ میں جانتا ہوں کہ مفسد اور کذاب کی بہت عمر نہیں ہوتی اور آخر وہ ذلت اور حسرت کے ساتھ اپنے اشد دشمن کی زندگی میں ہی ناکام و ہلاک ہوجاتا ہے اور اس کا ہلاک ہونا ہی بہتر ہوتا ہے تاکہ خدا کے بندوں کو تباہ نہ کرے۔ اور اگر میں کذاب اور مفتری نہیں ہوں اور خدا کے مکالمہ اور مخاطبہ سے مشرف ہوں اور مسیح موعود ہوں تو میں خدا کے فضل سے امید رکھتا ہوں کہ سنت اللہ کے موافق آپ مکذبین کی سزا سے نہیں بچیں گے پس اگر وہ سزا جو انسان کے ہاتھوں سے نہیں بلکہ محض خدا کے ہاتھوں سے ہے جیسے طاعون ‘ ہیضہ وغیرہ مہلک بیماریاں آپ پر میری زندگی میں وارد نہ ہوئی تو میں خدا ئے تعالیٰ کی طرف سے نہیں ۔ یہ کسی الہام یا وحی کی بناء پر پیشن گوئی نہیں بلکہ محض دعا کے طور پر میں نے خدا سے فیصلہ چاہا ہے ۔ اور میں خدا سے دعا کرتا ہوں کہ اے میرے مالک ‘ بصیر و قدیر ‘ جو علیم و خبیر ہے جو میرے دل کی حالت سے واقف ہے اگر یہ دعویٰ مسیح موعود ہونے کا محض میرے نفس کا افتریٰ ہے اور میں تیری نظر میں مفسد اور کذاب ہوں اور دن رات افتریٰ کرنا میرا کام ہے ‘ تو اے میرے پیارے مالک ! میں عاجزی سے تیری جناب میں دعا کرتا ہوں کہ مولوی ثنا ء اللہ صاحب کی زندگی میں مجھے ہلاک کر اور میری موت سے ان کو اور ان کی جماعت کو خوش کردے ۔ مگر اے میرے کامل اور صادق خدا : اگر مولوی ثناء اللہ ان تہمتوں میں جو مجھ پر لگاتا ہے حق پر نہیں تو میں عاجزی سے جناب میں دعا کرتا ہوں کہ میری زندگی میں ان کو نابود کر ‘ مگر نہ انسانی ہاتھوں سے بلکہ طاعون و ہیضہ وغیرہ امراض مہلکہ سے ۔ بجز اس صورت کے کہ وہ کھلے کھلے طور پر میرے روبرو اور میری جماعت کے سامنے ان تمام گالیوں اور بدزبانیوں سے توبہ کرے ۔ جن کو وہ فرض منصبی سمجھ کر ہمیشہ مجھے دکھ دیتا ہے ۔ آمین یا رب العالمین ۔ میں ان کے ہاتھ بہت ستایا گیا اور صبر کرتا رہا مگر اب دیکھتا ہوں کہ ان کی بدزبانی حد سے گزر گئی  ۔ وہ مجھے ان چوروں اور ڈاکوئوں سے بھی بدتر جانتے ہیں جن کا وجود دنیا کے لئے سخت نقصان رساں ہوتا ہے اور انھوں نے ان تہمتوں اور بدزبانیوں میں آیت (لَا تَقَفْ مَا لَیْسَ لَکَ بِہٖ عِلْمٍ) پر بھی عمل نہیں کیا اور تمام دنیا سے مجھے بدتر سمجھ لیا اور دور ‘ دور ملکوں تک میری نسبت یہ پھیلا دیا کہ یہ شخص درحقیقت مفسد اور ٹھگ اور دکاندار اور کذاب اور مفتری اور نہایت درجہ کا بَد آدمی ہے ۔ سواگر ایسے کلمات حق کے طالبوں پر بد اثر نہ ڈالتے تو میں ان تہمتوں پر صبر کرتا مگر میں دیکھتا ہوں کہ مولوی ثناء اللہ ان ہی تہمتوں کے ذریعہ سے میرے سلسلہ کو نابود کرنا چاہتا ہے اور اس عمارت کو منہدم کرنا چاہتا ہے جو تو نے اے میرے آقا اور میرے بھیجنے والے اپنے ہاتھ سے بنائی ہے ۔ اس لئے اب میں تیرے ہی تقدس اور رحمت کا دامن پکڑ کر تیری جناب میں ملتجی ہوں کہ مجھ میں اور ثناء اللہ میں سچا فیصلہ فرما ! اور وہ جو تیری نگاہ میں حقیقت میں مفسد اور کذاب ہے اس کو صادق کی زندگی میں ہی دنیا سے اٹھالے یا کسی اور سخت آفت میں جو موت کے برابر ہو مبتلا کر ۔ اے میرے پیارے مالک تو ایسا ہی کر۔ آمین ثم آمین

 رَبَّنَا افْتَحْ بَیْنَنَا وَبَیْنَ قَوْمِنَا بِالْحَقِّ وَاَنْتَ خَیْرُ الْفٰتِحِیْنَ۝۸۹   آمین (اعراف ) ترجمہ :’’ اے ہمارے رب ہمارے اور ہماری قوم کے درمیان انصاف کے ساتھ فیصلہ فرمادے اور تو سب سے بہتر فیصلہ کرنے والا ہے ۔‘‘

بالآخر مولوی صاحب سے التماس ہے کہ اس تمام مضمون کو اپنے پرچہ میں چھاپ دیں اور جو چاہیں اس کے نیچے لکھ دیں۔ اب فیصلہ خدا کے ہاتھ میں ہے ۔

الراقم : عبداللہ الصمد مرزا غلام احمد مسیح موعود عافاہ اللہ و اید

مرقومہ : ۱۵؍اپریل  ۱۹۰۷؁ء یکم ربیع الاول  ۱۳۲۵ ؁ھ ‘‘

آپ کے پیر و مرشد کی کذب بیانی و خلا بازی ملاحظہ ہو چنانچہ صریح الفاظ (خط کشیدہ ) میں اس اشتہار کو محض اپنی طرف سے دعا قرار دیا ہے لیکن دس دن بعد ہی یعنی ۲۵ ؍ اپریل  ۱۹۰۷ ؁ء کو قادیانی اخبار ’’بدر‘‘ میں یہ بیان دیا کہ یہ اشتہاری دعا ان کی طرف سے نہیں بلکہ خدا ہی کی طرف سے اس کی بنیاد رکھی گئی ہے

خود اشتہار سے ثابت ہے کہ آپ کے پیر و مرشد کی اشتہاری دعا مولوی ثناء اللہ صاحب امرتسری کے مقابلہ میں ’’ایک تحریری یک طرفہ مباہلہ ‘‘ تھا جس کے نتیجہ میں اس اشتہار کی اشاعت کے تیرہ مہینے بارہ دن بعد ۲۶ ؍ مئی  ۱۹۰۸ ؁ء کو مرزا صاحب اپنے ہی نامزد کردہ ( درج اشتہار ) ایک بیماری ہیضہ (اسہال ) سے انتقال کرگئے ۔ جس کی تفصیل خود ان کی بیوی نے بیان کی ہے جس کو ان کے صاحبزادے نے روایت کیا ہے ۔ (ملاحظہ ہو :سیرۃ المہدی ۔ صفحہ ۱۰۹ )

’’پہلے ایک پاخانہ آیا اور اتنے میں آپ کو ایک اور دست آیا مگر اب اس قدر ضعف تھا کہ آپ پاخانہ نہ جاسکتے تھے اس لئے چار پائی کے پاس ہی بیٹھ کر فارغ ہوگئے پھر اٹھ کر لیٹ گئے اور میں پائوں دباتی رہی مگر ضعف بہت ہوگیا اور اس کے بعد ایک اور دست آیا پھر آپ کو ایک اور قئے آئی جب آپ قئے سے فارغ ہوکر لیٹنے گئے تو اتنا ضعف تھا کہ آپ پشت کے بل چارپائی پر گر پڑے اور آپ کا سر چار پائی کی لکڑی سے ٹکرایا اور حالت دگرگوں ہوگئی ۔ ‘‘

اس کے علاوہ قادیانی اخبار ’’الحکم ‘‘  ۲۸؍ مئی  ۱۹۰۸ ؁ء کے ضمیمہ میں جو تفصیل شائع ہوئی ہے اس کا خلاصہ یہ ہے کہ

 ’’۲۵؍ مئی  ۱۹۰۸ ؁ء کی شام کو مرزا صاحب پر ان کی قدیم بیماری اسہال کا دورہ ہوا ‘ گیارہ بجے رات میں ایک زور دار دست آنے پر از حد کمزوری آگئی دو اور تین بجے کے درمیان ایک اور زبردست دست آنے پر نبض بالکل بند ہوگئی ۔ طبیبوں اور ڈاکٹروں نے حالت معمول پر لانے کی سر توڑ کوشش کی لیکن مرزا صاحب مسلسل گیارہ گھنٹے تک موت و حیات کی کشمکش میں مبتلا رہ کر ۲۶؍ مئی کو سوا دس بجے فوت ہوگئے۔‘‘

لیکن ثناء اللہ صاحب امرتسری ‘ مرزا صاحب کے انتقال کے بعد ۴۰ برس تک زندہ رہے۔ اس طرح مرزا صاحب کا خود ان کی دعا و طلب کے مطابق برسر باطل ‘ کذاب و دجال ہونا ایک ایسا حقیقت واقعہ بن چکا ہے جس کا انکار ممکن نہیں ۔ جب پیر و مرشد ہی برسر باطل ‘ کذاب و دجال تھے تو پھر ان کے متبعین کیسے برحق ہوسکتے ہیں ۔ آپ کے مباہلہ کو قابل اعتنا سمجھنا آزمودہ را آزمودن جہل است ‘ ہی نہیں بلکہ گمراہی ہے ۔ آپ کا چیلنج مباہلہ ۔ ’’الٹا چور کوتوال کو ڈانٹے ‘‘ کے مترادف ہے ۔

آپ مرزا صاحب کے اگر واقعی جانشین ہیں تو اپنے پیر و مرشد کی سنت کی پیروی کیجئے یعنی مرزا صاحب اور جماعت احمدیہ کے خلاف کتابیں لکھنے والوں کا نام لے لے کر مرزا صاحب جیسی دعائیں شائع کیجئے اور نتیجہ کا انتظار کیجئے ۔

مرزا صاحب کو دجّال و کذّاب جو کہا گیا ہے وہ کوئی ہوائی باتیں نہیں ہیں بلکہ خود انکی اپنی تحریرات کو پیش کرکے ہی ان کے دجل و کذب کو ثابت کیا گیا ہے۔ اس لئے آپ کے لئے صحیح طریقہ کار تو یہ ہے کہ جن تحریرات کی بنا پر مرزا صاحب کو کذاب و دجال و مفتری قرار دیا گیا ہے ان کا مرزا صاحب کی تحریرات نہ ہونا ثابت کریں یا آپ مسلمانوں کے خلاف عدالتوں میں ازالہ حیثیت عرفی کے دعوے دائر کریں۔

قلوب میں وسوسہ پیدا کرنے کے بعد  اِنِّی اَخَافُ اللّٰہَ رَبَّ الْعَالَمِیْن ۔ ترجمہ:  ’’کیونکہ میں اللہ سے بہت ڈرتا ہوں جو تمام عالموں کا (تنہا و اکیلا )پروردگار ہے ۔ ‘‘  (سورہ مائدہ ۔۲۸)  کہنا شیطان ہی کا کام ہے ۔ بالکل اسی طرح آپ کا یہ مباہلہ کا چیلنج بھی ہے۔ 

قیامت تک قرآن کی حفاظت کا جب وعدہ ٔ الٰہی موجود ہے تو جماعت احمدیہ پر حزب الشیطان ہی کا اطلاق ہوتا ہے کیونکہ امت محمدیہ میں پھوٹ ڈالنا شیطان ہی کی کارستانی ہے ۔ بہرحال و بہر کیف موت یقینی و اٹل ہے ۔ اللہ تعالیٰ اپنے قانون کے مطابق حق و باطل کا فیصلہ فرمادے گا۔

وَمَا تَوْفِیْقِی اِلَّا بِاللّٰہِ عَلَیْہِ تَوَکَّلْنَا وَ اِلَیہِ اَنَبْنَا وَ اِلَیْہِ الْمَصِیر